DE FAMILIEKRACH

De Vadder un de Schwichersohn
hänn en normale Umgangston.
Vum selwe Holz sinn die zwää g'schnitzt.
Un selde werd do uffgeblitzt.

Doch heit war ebbes in de Luft!
Ich heer noch, wie de Babbe ruft:
„Heit brauchen mer en klare Kobb!
Mer gäjin glei nuff in d' Hinnerstobb.“

Ma heert noch, wie die Deer zugeht,
de Schlissel werd schnell rumgedreht
un d' Stiehl geriggt. Mer heert's rumore,
un d' Mamme unne spitzt die Ohre.

Am Afang heerschtd' kää änzich Wort.
Doch dann werd's lauter fort un fort.
Un d' Mudder saacht: „Ich mach e Wett:
Vun de Erbschaft werd geredt!“

Un dann geht’s drowwe richtich lous:
's Gegrisch werd laut, 's Geblärr werd grouß.
Vor Zorn kreischt dann de Vadder laut:
„Du hoscht dei gräjischdie Chance vesaut!“

Do war de Mamme zimmlich klar,
dass niggs mäh werd, wie's frieher war!
Vor lauder Angscht, vor lauder Sorche
schiggt se de Fritzel nuff zum Horche.

Der schleicht sich häämlich nuf an d' Deer
un ruft: „Wääscht, Mamme, was ich heer?
Ich säähn, warum's do blärrt un kracht:
Die hänn de Fernseh agemacht!
Ich gugg dorch's Schlisselloch un sähn's:
Heit speelt Lautre geche Määnz!“

Wilfried Berger
Essingen / Lobsann/Elsaß

Zurück zur Übersicht     -     Zurück zur Startseite